“ОРОСЫН БОЛОВСРОЛЫН ОНЛАЙН ҮЗЭСГЭЛЭН-2021” албан ёсны нээлтээ хийлээ Жил бүр Улаанбаатар дахь “Русский дом”-с зарлагддаг ОХУ-ын Засгийн газрын 600 тэтгэлгийн сонгон шалгаруулалтыг угтсан VI дахь удаагийн Оросын боловсролын онлайн үзэсгэлэнгийн нээлт онлайнаар болж, үйл ажиллагаа нь http://expo.edurussia.mn/ сайт дээр эхэллээ. Нээлтийн ёслолд БШУЯ-ы гадаад харилцаа, хамтын ажиллагааны газрын дарга Ж.Нарантуяа, Монгол улс дахь ОХУ-ын ЭСЯ-ы элчин-зөвлөх Краминцев С.А., ХНХЯ-ы Мэргэжлийн боловсрол сургалтын үнэлгээ, мэдээлэл арга зүйн төвийн дарга Ц.Батдорж, Нийслэлийн боловсролын газрын орлогч дарга Д.Цогзолмаа, Россотрудничество агентлагийн Монгол дахь төлөөлөгчийн газрын орлогч дарга Кильпякова В.В., ШУА-ийн эрдэмтэн нарийн бичгийн дарга Б.Авид, ОХУ-ын ЗГ-ын дэргэдэх Санхүүгийн их сургуулийн дэд проректор Ременцов А.Н., ОХУ-ын ЭСЯ-ны дэргэдэх ЕБС-ийн захирал Ярикова Е.Д., Edurussia Оросын боловсролын төвийн захирал, ОХУ/ЗХУ-д төгсөгчдийн МАВСУЗ холбооны гүйцэтгэх захирал Ц.Шүрэнчимэг нар оролцов. Оросын боловсролын үзэсгэлэн нь Засгийн газрын 100%-ийн тэтгэлгээр суралцах гэж байгаа залууст ОХУ-ын чансаа өндөр тэргүүлэх сургуулиудыг урьж оролцуулан мэргэжил сургуулийн оновчтой сонголт хийх боломжийг олгодогоос гадна, үзэсгэлэнгийн үеэр сонгон шалгаруулалтын журам шаардлагуудын талаар Улаанбаатар дахь “Русский дом”-с албан ёсны мэдээлэл хийдэг. Энэ жилийн үзэсгэлэнд ОХУ-ын 11 муж хотуудаас 21 чансаа өндөр их сургуулиуд оролцож, Оросод суралцах болон амьдрах орчин, амьдралын өртөг, оюутны байр, даатгал, виз, унаа тээвэр, аюулгүй байдал, оюутнуудын ажил эрхлэлт, хөнгөлөлт, тэтгэлэг, грант, тэтгэмжүүдийг авах бусад боломжуудын талаар мэдээлэл, зөвлөгөөг нэгэн дор олгох болно. Мөн түүнчлэн энэ удаагийн үзэсгэлэн нь илүү өргөн хүрээнд болох бөгөөд сурагч, оюутан, залуусыг мэргэжлийн чиг баримжаа олгох вебинарууд, Оросын сургуулиудын нээлт ололт, шинэ бүтээл, брэнд бүтээгдэхүүнүүд, IT, дижитал технологи, инженер техник, менежмент маркетинг, бизнес удирдлага, хими технологи чиглэлээршилдэг экспертүүдийн үнэ төлбөргүй лекц, ярилцлага, үзүүлэх сургалтууд, Оросод суралцаж буй оюутнуудын “Сургуульдаа хүрэх зам-2021” онлайн Форум, Оросын их сургуулиуд /30 гаруй сургуулиуд/ болон төгсөгчдийн “Сургуульдаа Баярлалаа!” онлайн Форум, төгсөгчдийн зөвлөгөө, туршлагууд зэрэг арга хэмжээнүүд хүлээж байгаа! Шинэ Орос орон бол өнөөгийн дэлхийн тэргүүлэгч гүрнүүдийн нэг. Анагаах ухаан, академик боловсрол, шинжлэх ухаан, инженерийн шийдлүүд, сансар судлал, аюулгүй байдал, батлан хамгаалах, сонгодог урлаг, соёл иргэншлээрээ дэлхийд тэргүүлэгч улсуудын нэг. Монгол улс нь 70 гаруй жилийн турш Орос оронтой ах дүүгийн харилцаатай явж ирсэн. Өнөөгийн манай орны бүтээн байгуулалт, НҮБ-д бүх нийтээрээ бичиг үсэг тайлагдсан үнэлгээ авч байсан үзүүлэлт бол Орос хөрш орны ач тус. Иймээс зохион байгуулагч нарын зүгээс дэлхийн боловсролыг тив дамнан эрэх бус хил залгаа Орос орондоо эзэмшин, Монголд хамгийн их тэтгэлэг олгож байгаа боломжийг алдахгүй байхыг элсэгч, оюутан залуучууддаа санал болгож байлаа. Учир нь Оросод сурна гэдэг нь академик боловсрол эзэмшихээс гадна оюутан солилцооны хөтөлбөрт хамрагдан Европ, Азийн бусад орнуудад суралцах, урлаг спорт, олон улсын форум, арга хэмжээнүүдэд оролцох Таны амьдрал дахь онц сонирхолтой аялал байдаг. Онлайн үзэсгэлэнгийн хөтөлбөр: https://edurussia.mn/online-exhibition-program Онлайн Үзэсгэлэнд бүртгүүлэх: http://expo.edurussia.mn/ ЗГ-ын тэтгэлгийн шалгаруулалтын журам: https://edurussia.mn/gov-scholarship
