“Академик түншлэл хөтөлбөр” ба олон талт хамтын ажиллагаа

2023 оны 4 сарын 8-наас 24-ний өдрүүдэд Оросын соёл боловсрол оюуны хөрөнгө оруулалтын төв (Edurussia)-өөс санаачлан Засгийн газрын хэрэгжүүлэгч агентлаг – Боловсролын ерөнхий газар, Нийслэлийн боловсролын газартай хамтран хэрэгжүүлж буй “Академик түншлэл” хөтөлбөрийн хүрээнд дэлхийн рейтингэд тэргүүлэгч ОХУ-ын Өмнөд Уралын улсын их сургууль, Сеченовын анагаахын улсын их сургуулиуд Монголд ажлын айлчлал хийлээ.

Айлчлалын хүрээнд тус сургуулиудын төлөөлөгчид Улаанбаатар хот, Дархан-Уул болон Орхон аймгуудын удирдлагууд, их дээд, тусгай болон дунд боловсролын байгууллагууд, үйлдвэр, аж ахуйн нэгжүүдийн удирдлагуудтай уулзалт, яриа хэлэлцээ хийж, цаашид шинжлэх ухааны хамтарсан судалгаа, сургалт зохион байгуулах, боловсрол болон анагаах ухааны салбаруудад холбогдох төсөл хөтөлбөрүүдийг хэрэгжүүлэх талаар санал солилцов. Харин тус сургуулиудад элсэн суралцах хүсэлтэй оюутан сурагчдад сургуулиудын танилцуулга уулзалт хийж, элсэлтийн анхан шатны сорилын тест шалгалтуудыг зохион явуулсан бөгөөд зорилтот хөтөлбөрийн хүрээд Монгол элсэгчдэд зориулан мужийнхаа Засгийн газрын тэтгэлгээр сургах, олимпиадад нь түрүүлсэн хүүхдүүдэд зуун хувийн тэтгэлэгтэй болон хөнгөлөлттэй үнээр сурч амьдрах боломжийг олгох талаар үнэтэй мэдээлэл зөвлөгөө өгсөн юм.

Ийнхүү олон талт хамтын ажиллагаа, харилцан сонирхож, хамтран ажиллах эрэлт хэрэгцээг бий болгосон “Академик түншлэл” хөтөлбөрийн хүрээн дэх ээлжит арга хэмжээ маань амжилттай болж өндөрлөсөн ба хамтарч ажилласан Боловсролын ерөнхий газар, Нийслэлийн боловсролын газар, Дархан-Уул, Орхон аймгуудын тамгын газрууд, нийт боловсрол сургалтын байгууллагууд, үйлдвэр аж ахуйн нэгжүүдийн удирдлага, хамт олондоо “Edurussia”-ийн хамт олны өмнөөс талархлаа илэрхийлж, цаашид хэлэлцэж, төлөвлөсөн ажлуудад нь амжилт хүсье!